Lětsa bu na Budyskej Lipowej šuli z wulkim zapalom slědźene, planowane a twarjene. Pod hesłom „Što čini pčołka, hdyž je doma?“ so šulerki a šulerjo hłuboko do fascinowaceho swěta mjedowych pčołkow zanurichu. Při tym njenawuknychu jenož tójšto wo žiwjenju w kołću, ale tež wo tym, kotry wuznam pčołki za přirodu, wobswět a ratarstwo maja.
Budyska Lipowa šula přewodźa dźěći a młodostnych z najwšelakorišimi spěchowanskimi potrjebami. Ćim bóle jimace za nas bě dožiwić, z kotrej zahoritosću, wutrajnosću a kreatiwitu so šulerki a šulerjo projektej wěnowachu. Kóždy dźěłaše po swojich wosobinskich sylnosćach a pokaza, zo móže zhromadne dźěło barjery přewinyć a wuslědki su wurjadne.
Hižo nalěto započa so intensiwne projektowe dźěło. Z měru, piłu, akušrubowakom a kopicu kreatiwnych idejow wuspytachu młodźi slědźerjo cyle wosebitu pčólnicu wuwić. Při tym jich znowa Günter Sodan z fachowej wědu, sćerpliwje a wušiknje ze swojimi nazhonjenjemi přewodźeše.
Wuknyć z hłowu, wutrobu a ruku
Wosebje rjenje wobkedźbować bě, kak šulerki a šulerjo w běhu projekta ze swojimi kmanosćemi rosćechu. Tójšto dźěłowych kročelow žadaše sej koncentraciju, sćerpnosć a mjezsobnu podpěru. Přiswojichu sej rjemjeslniske kmanosće, nowu wědu wo přirodźe kaž tež sebjewědomje, teamowy duch a mějachu wjeselo nad zhromadnym wuspěchom.
Wirtuelna pčólnica je tuž wjace hač jenož informaciske městno wo mjedowych pčołkach. Zdobom pokazuje, što zamóža dźěći a młodostni docpěć, hdyž jim dowěrješ, jich spěchuješ a jim móžnosć skićiš, swójske ideje zwoprawdźić. Samo domjaca šulerska nowina wo wirtuelnej pčólnicy rozprawješe.
Słódki dźak k zakónčenju projekta
Po telko dźěle smědźeše so tež swjećić. Hižo wot ranja přihotowachmy zakónčenje projekta z połnej paru.
Wo wjeršk postara so pjekarski mišter Rico Kuntsche z "Pječwoweje stwički“ na Pchalekowej w Budyšinje. Z čerstwym, złotožołtym a přewšo słódnym mjedowym tykancom (Bienenstich) wón wšitkich wobdźělenych překwapi. Wosebje za dźěći bě słódka překwapjenka wosebity wokomik a mytowanje za wukonjane dźěło.
Słódny tykanc wobradźi wjesołe mjezwoča a wulku zahoritosć. Při zhromadnej swačinje šulerki a šulerjo hordźe na swoje dźěło zhladowachu a sej zakónčenje swojeho projekta prawje lubić dachu.
Šulske zjednoćenstwo dźakuje so Rico Kuntsche a Günterej Sodanej za wšu podpěru. Jeju gesty pokazuja nam, kak wažne su zhromadnosć, připóznaće a towaršnostny angažement za spěchowanje dźěći a młodostnych.
